रचना विनोद
Description
अपनी गल्ल
चेतें दा समंदर डूंगा, मता गे डूंगा। जुदाइएं दा परबत उच्चा, मता गे उच्चा। हिरखी मन इनैं सबनें गी अपने च समेटिए कदे समंदरे च चलोबी ल
...
ांदा कदे परबतें च रस्ते तुप्पदा। बोली दी मठास जिल्लै कलमै दी श्याई च घुलदी ऐ खबरै किन्ने मिठ्ठे-कौड़े चेतें दे बरके परतौंदे न। कुतै कुढ़तन, कुतै खुल्लापन, कुतै रोना-धोना ते कुतै हास्से-गढ़ाके। इयां बजोंदा जियां चलोबी बी लगी गेई थे परबत बी लुआंगी लेया। ए चेतें दे बरके परतौंदे न जां मने दियां परतां खुलदियां न, इसी ते जां लिखने आला जाने जां जिस कुसै गी अक्खर जाने-पनछाने लग्गन। उयां भी मने दियां परतां खुल्लने तांई अक्खरें करने जान-फनछान औना बी मता ज़रुरी ऐ, जेड़ा सबनें शां ओक्खा कम्म ऐ। इक बारी बुनियादी अक्खरें कन्ने पनछान ओई जा तां फी परतां खुल्लदे चिर नेइ लगदा। मती पुरानी खुआन ऐ जे मानु समाजी जी ऐ। इकल्ला मानु किश नेइ करी सकदा। अप्पनियां सारी लोड़ां पूरी नेइ करी सकदा। ते इस्स करी उसी दूए मानुएं दी लोड़ पौंदी ऐ। इक्क दूए कन्ने गल्ल-बात करने, इक्क-दुए दी गल्ल-बात समझने तांईं उन्ने 'शारें ते फी अक्खरें दा सा'रा लैता- ओ अक्खर जेड़े गल्ल समझदे बी ऐन ते समझांदे बी, जखम देंदे बी ऐन, फरोलदे बी ऐन ते जखम भरदे बी ऐन। जेड़ी ओख मानुए गी शुरू च अक्खर बनाने ते बदाने च ओइ, उए जेइ ओख अज्जे दे समें ऊनें बुनियादी अक्खरें गी पनछानने च औंदी ऐ ते जिल्ले इक्क बारी पनछान ओई जा तां मने दी तांग उंदे कन्ने कुते दी कुते डुआरी भरन लगदी ऐ।ते उसलै ए मता गे जरुरी ओई जंदा जे उनें अक्खरें गी सेई समझिए सेई इस्तमाल कित्ता जा। ईदे कन्ने फी इक्क दुई गल्ल जुड़दी ऐ जे सेई ते गलत दी पनछान आला जानकार गे सेई ते गलत था पता कराइ सकदा ऐ।ओ मती गे किस्मत आला औंदा ऐ जिसी नेया जानकार मिली जा। इस्स डुग्गर परदेसे च डोगरी च लिखने आले बड़े-बड़े दिग्गज लखारी न, जेड़े बीरें कन्ने भरोची दी इस्स धरती बारे मते खरे जानकार न ते जिन्हें मता किश लिखया बी। ए नेइ धरती ऐ जिदे उप्पर वैष्णो देवी दी खास किरपा ऐ जिन्ने केई लखारिएं गी इनें बीरें-भगतें बारे लिखने तांईं प्रेरित कित्ता। ऊयां ते देवी-देवता कुसै जात-बिरादरी, देस-परदेस जां बोली-भासा कन्ने नेई बजोए दे औंदे पर फी बी डुग्गर बीरें दी इस्स बोली च "अड़या मड़या गीतें भरया" लिखदे ओई ए आक्खना, लिखना जरूरी समझनियां जे इस्स देस्से च मां वैष्णो देवी दा बास ऐ ते उदी किरपा कन्ने गे मेरी खुशनसीबी ऐ जे चंगे-माड़े समै च साथ नबांदे, चंगे-माड़े दी पनछान कराने आले कन्ने-कन्ने रेह् जिंदी बदौलत मेरी कलम जिंदगी दे खिल्लरे दे, ताईं-तुआईं पेदे बरकें गी किठ्ठा करिए " अड़या मड़या गीतें भरया" लिखी सकी।
डोगरी-हिन्दी साहित्य दे मन्ने-परमन्ने साहित्यकार, फिल्म ते टेलीविजन दे निर्माता, निर्देशक, पटकथा ते संवाद लेखक आदरजोग श्री वेद राही औंदी आभारी आं जिनें 'अड़या मड़या गीतें भरया' गी अपनी कीमती राय देइए मिगी मता प्रोत्साहित कित्ता।
साहित्य सिरजना दी इस जात्रा च मेरे पति श्री विनोद गुप्ता औंदा सहयोग खास करि उल्लेखनीय ऐ।
- रचनाविनोद
मोबाइल व्हाट्सएप --- 778094744
ई- मेल - [email protected]
Read more